The Knowledge Gateway

वाग्मती प्रदेश सरकारले ५१ अर्ब ४२ करोड रुपैयाँको नयाँ बजेट सार्वजनिक गरेको छ । सोमबार प्रदेश सरकारका आर्थिक मामिला तथा योजना मन्त्री कैलाश ढुंगेलले प्रदेससभामा आगामी आर्थिक वर्ष २०७७–०७८ का लागि ५१ अर्ब ४२ करोड ७४ लाख ९४ हजार रुपैयाँको बजेट प्रस्तुत गरेका हुन् । कुल विनियोजित बजेटमध्ये चालुतर्फ २६ अर्ब २८ करोड ७३ लाख ३५ हजार पुँजीगततर्फ २५ अर्ब १४ करोड १ लाख ५९ हजार रहेको उनले बताए । कुल विनियोजित बजेटमध्ये चालुतर्फको बजेट ५१.१२ प्रतिशत र पुँजीगत तर्फको बजेट ४८.८८ प्रतिशत हुन आउँछ ।

आगामी आर्थिक वर्षका लागि अनुमान गरिएको खर्च व्यहोर्ने स्रोतमध्ये कर राजस्वतर्फ २० अर्ब ८३ करोड ७९ लाख, अन्तरसरकारी अनुदानतर्फ १७ अर्ब ८६ करोड ९८ लाख, अन्य राजस्वतर्फ ५ अर्ब १२ करोड ९७ लाख र राजस्व बचततर्फ ७ अर्ब ५० करोड प्राप्त हुने अनुमान गरिएको छ । रोजगारी सिर्जना, स्वास्थ्य, शिक्षा, कृषि लगायतमा बजेट केन्द्रित गरिएको छ ।