The Knowledge Gateway

काठमाडौं : नेप्सेमा सूचीकृत ५० लघुवित्त कम्पनीहरुले चालु आर्थिक वर्षको पहिलो त्रैमासको वित्तीय विवरण सार्वजनिक गरेका छन् । सार्वजनिक वित्तीय विवरणअनुसार कम्पनीको खुद ब्याज आम्दानी, नाफा, प्रतिसेयर आम्दानीलगायतका प्रमुख सूचक बढेका छन् । प्रतिकूल अवस्थामा पनि लघुवित्त कम्पनीहरुले गरेको प्रगतिलाई औसतमा राम्रो मान्न सकिन्छ । लघुवित्तहरुको इपीएस पनि अन्य क्षेत्रका कम्पनीहरुको तुलनामा सबल रहेको देखिन्छ । वित्तीय विवरण सार्वजनिक गर्नेमध्ये चुक्ता पुँजीमा छिमेक लघुवित्त अगाडि छ ।

चालु आर्थिक वर्षको पहिलो त्रैमाससम्म आइपुग्दा सबैभन्दा धेरै चुक्ता पुँजी छिमेक लघुवित्तको रहेको छ । यसको चुक्ता पुँजी २२% ले बढेर १ अर्ब ८३ करोड रुपैयाँ पुगेको छ । अरु ६ लघुवित्तको चुक्ता पुँजी पनि १ अर्ब रुपैयाँभन्दा माथि छ । एक वर्षको अवधिमा ३८ कम्पनीको चुक्ता पुँजी बढेको छ भने १२ कम्पनीको चुक्ता पुँजी गत वर्षकै यथावत रहेको छ । सबैभन्दा धेरै चुक्ता पुँजी बढ्नेमा महुली लघुवित्त रहेको छ । यसको चुक्ता पुँजी १३०.५३% ले बढेर २८ करोड २१ लाख ६९ हजार रुपैयाँ पुगेको छ ।

चालु आर्थिक वर्षको पहिलो त्रैमाससम्म आइपुग्दा सबैभन्दा धेरै जगेडा कोष निर्धन उत्थान लघुवित्तको रहेको छ । यसको जगेडा कोष ५८.७६% ले बढेर ३ अर्ब ६१ करोड ५ लाख ९७ हजार रुपैयाँ पुगेको छ । त्यस्तै, छिमेक लघुवित्तको जगेडा कोषमा ३ अर्ब २८ करोड र साना किसान लघुवित्तको जगेडा कोष २ अर्ब ४९ करोडभन्दा धेरै छ । एक वर्षको अवधिमा ४८ कम्पनीको जगेडा कोष बढेको छ । मिथिला लघुवित्तको जगेडा कोष घटेको छ भने घाडिघोडा लघुवित्तको जगेडा कोष ऋणात्मक छ ।

खुद ब्याज आम्दानीमा छिकेक लघुवित्त अगाडि

असोज मसान्तसम्म आइपुग्दा सबैभन्दा धेरै खुद ब्याज आम्दानी छिमेक लघुवित्तले कमाएको छ । यसको खुद ब्याज आम्दानी २३.५०% ले बढेर ५३ करोड ३८ लाख ६० हजार रुपैयाँ पुगेको छ । यसअवधिमा ४२ कम्पनीको खुद ब्याज आम्दानी बढेको ।

आरएमडीसीको खुद नाफा सबैभन्दा धेरै

 पहिलो त्रैमासको अन्त्यसम्ममा आरएमडीसी लघुवित्तले सबैभन्दा धेरै २६ करोड २४ लाख २२ हजार रुपैयाँ खुद नाफा गरेको छ । दोस्रोमा छिमेक लघुवित्तले २१ करोड रुपैयाँ भन्दा बढी खुद नाफा कमाएको छ । गत वर्ष नोक्सानमा रहेको निर्धन उत्थान अहिले तेस्रो धेरै नाफा कमाउने लघुवित्त बनेको छ । घोडिघोडा र नेपाल सेवा भने नोक्सानमा गएका छन् ।

जीवन विकासको प्रतिसेयर आम्दानी उत्कृष्ट

यसै वर्ष नेप्सेमा सूचीकृत भएको जीवन विकास लघुवित्तको प्रतिसेयर आम्दानी सबैभन्दा धेरै रहेको छ । यसको प्रतिसेयर आम्दानी ११६ रुपैयाँ ११ पैसा छ । दोस्रोमा महिला लघुवित्तको ११४ रुपैयाँ ११ पैसा छ । यी दुईसहित कुल ४ वटा लघुवित्तको प्रतिसेयर आम्दानी १०० रुपैयाँ भन्दा धेरै देखिएको छ ।