काठमाडौं : प्रभु र कुमारी बैंकले संस्थापक सेयरधनीको नाममा रहेको सेयर बिक्रीमा ल्याएका छन् । कुमारी बैंकले केही संस्थापक सेयरधनीहरुको नाममा रहेको ११ हजार २२ कित्ता संस्थापक सेयर बिक्रीमा ल्याएको हो । यस बैंकले लोकमाया गुरुङको २ हजार ३०५, कृष्ण तारुम थापा मगरको ३ हजार ४५३ र भरत बहादुर बुढाथोकीको नाममा रहेको ५ हजार २६४ कित्ता संस्थापक सेयर बिक्री खुला गरको हो ।
यसमा बैंकका विद्यमान अन्य संस्थापक सेयरधनीले आवेदन दिन सक्नेछन् । सेयर खरिद गर्न इच्छुक संस्थापक सेयरधनीले आज शुक्रबार (असोज १९ गते) बाट ३५ दिनभित्र आवेदन दिनुपर्नेछ । बैंकको प्रधान कार्यालय, टंगाल वा कुमारी क्यापिटलको कार्यालय नक्साल नागपोखरी, काठमाडौंमा खरिद गर्न चाहेको सेयर संख्या खुलाई आवेदन दिनुपर्नेछ ।
सेयर भाउ भने बिक्रेताले तेको वमोजिम हुने सूचनामा उल्लेख छ । उक्त समयमा संस्थापक सेयरधनीले सेयर खरिद नगरे अन्य व्यक्ति वा संस्थालाई सेयर बिक्री गरिने बैंकले जनाएको छ ।
त्यसैगरी, प्रभु बैंकले पनि केही संस्थापक सेयरधनीको नाममा रहेको २० हजार २०२ कित्ता संस्थापक सेयर बिक्रीमा ल्याएको छ । बैंकले शुशिला देवी सिंघानियाको १० हजार ९३५, रजन श्रेष्ठको ५ हजार र नितु अग्रवालको ४ हजार २६७ कित्ता संस्थापक सेयर बिक्रीमा ल्याएको हो ।
यसमा विद्यमान संस्थापक सेयरधनी वा अन्य कुनै व्यक्ति, सघं सस्थाले पनि आवेदन दिन सक्नेछन् । सेयर खरिद गर्न इच्छुकले आज शुक्रबार (असोज १९ गते) बाट १५ दिनभित्र बैंकको केन्द्रीय कार्यालय बवरमहल, काठमाडौंमा निवेदन पेश गर्नु पर्नेछ ।
यसअघि बैंकका विद्यमान संस्थापकहरुलाई सेयर बिक्री खुला गर्दा आवेदन नपरेको हुनाले बैंकले यस पटक अन्य लगानीकर्ताले पनि आवेदन दिन मिल्ने व्यवस्था गरिदिएको हो । बैंकले यो सेयरको भाउ भने तोकेको छैन ।
