![\"\"](\"http://aabhaash.com/wp-content/uploads/2020/06/NRB.jpg\")
नेपाल धितोपत्र बोर्डले सेयर बजार सुधारका लागि केही महत्वपूर्ण कदमहरु चाल्न केन्द्रीय बैंकसँग आग्रह गरेको छ । कोरोनाबाट आहत भएको सेयर बजारलाई गति दिन सेयर धितो कर्जामा प्रवाह भएको ऋणको ब्याज तिर्ने समय असोज मसान्तसम्म पुर्याउन भनिएको छ । यसैगरी, मार्जिन सीमा भित्रै रहेका ऋणको नवीकरण वक्यौता रकममा नै नवीकरण गर्ने व्यवस्था मिलाउन पनि अनुरोध गरिएको छ । यससँगै धितोपत्र बोर्डले विभिन्न ४ वटा बुँदामा सुधारको व्यवस्था गर्न राष्ट्र बैंकसँग अनुरोध गरेको छ । जुन निम्न अनुसार छन् ।
१. बैंक तथा वित्तीय संस्थाहरुले सेयर धितोमा प्रवाह गर्ने कर्जामा सेयर मूल्यांकनको ६५ प्रतिशतसम्म कर्जा प्रवाह गर्ने र मार्जिन कलको हकमा बैंक तथा वित्तीय संस्था स्वयंले मूल्य अनुगमन गर्ने व्यवस्था रहेकोमा सेयर धितोमा कर्जा प्रवाह गर्दा सेयरको मूल्यांकनको ७५ प्रतिशतसम्म कर्जा प्रवाह गर्न सक्ने र १० प्रतिशत भन्दा बढी मूल्य घटेको अवस्थामा मात्रै मार्जिन कल गर्ने व्यवस्था गर्न उपयुक्त हुने ।
२. सेयर धितोमा गएको कर्जामा हालको महामारी तथा विषम परिस्थितिको अवस्थालाई दृष्टिगत गरी ब्याज तिर्नुपर्ने समय २०७७ आश्विन मसान्तसम्म बढाइदिने र मार्जिनको सीमा भित्रै रहेका ऋणहरु बक्यौता रकममा नै नवीकरण गरिदिने व्यवस्था गर्न उपयुक्त हुने ।
३. विद्युतीय माध्यमबाट लगानीकर्ता र धितोपत्र दलालबीच रकम पठाउँदा र प्राप्त गर्दा रकमान्तर हुने रकमको सीमा नरहने व्यवस्था गर्न उपयुक्त हुने ।
४. बैंक तथा वित्तीय संस्थाहरुले धितोपत्र दलाल व्यवसायीलाई मार्जिन कारोबारका लागि प्रवाह गर्ने ऋणको ब्याजदर बैंक स्वयंले प्रत्यक्ष सेयर धितोमा प्रवाह गर्ने कर्जाको ब्याजदर भन्दा कम हुने व्यवस्था गर्न उपयुक्त हुने ।
