जसरी हामीले आफ्नो घर बलियो बनाउन गुणस्तरीय निर्माण सामाग्रीहरुको प्रयोगमा ध्यान दिइरहेका हुन्छौं त्यसरी नै घर बसाई सुखद बनाउन वास्तुशास्त्रदेखि आन्तरिक सजावटसम्म उत्तिकै ध्यान दिनुपर्ने हुन्छ ।
आवास निर्माणका लागि भनेर खरिद गरिने जग्गाको बास्तु मिलेको उपयुक्त हुनुपर्छ । घर बनाउँदा बास्तु मिलायो भने बसाई लाभदायक हुन्छ । गृह प्रवेशदेखि आन्तरिक सजावट, कोठाको निर्धारणसम्म हामीले बास्तुशास्त्रलाई ध्यान दिनुपर्छ ।
बास्तु मिलेको घडेरी खरिद गरिसकेपछि सम्पुर्ण कुरा विचार गरेर पहिले शिलान्यासको मूहुर्तमा वास्तुविदसँग परामर्श लिनुपर्छ । हामीले शुभ मूहुर्तमा निर्माण कार्य थालनी गर्नुपर्छ ।
मानिसको पञ्चतत्वसँग नजिकको सम्बन्ध भएकाले मानव जीवनमा पञ्चतत्वले महत्वपूर्ण प्रभाव पार्दछ ।
भूमि
विभिन्न कोणबाट शुभ भूमि चयन गनुपर्दछ ।
पानी
भवनको निमार्णदेखि नै पानी चाहिने भएकाले पानीको स्थान पूर्वोत्तर अर्थात ईशान कोणमा उचित मानिन्छ । ईनार कुवाका लागि ईशान कोणमा पानीको स्रोत बनाउनु पर्छ ।
पानीको स्रोतका लागि घर निर्माण सुरु गर्नुभन्दा पहिला नै पर्याप्त जग्गा छोड्नुपर्छ । ईशान कोणमा पानीको स्रोत निर्माण गर्न सम्भव छैन भने ट्यांकीको पानी ईशानमा झर्ने गरी धारो बनाउनुपर्छ ।
वायु
प्राणिक ऊर्जा प्राणदायिनी शतिmको रुपमा वायुलाई बुझिन्छ । भौगोलिक बनावटका आधारमा घरभित्र शुद्द हावाको प्रवेशका लागि पश्चिमोत्तर वायव्य कोणमा खाली ठाउँ राख्नु आवश्यक मानिन्छ ।
अग्नी
अग्नि (तेज) तीन प्रकारका हुन्छन् । सूर्यको प्रकाशलाई प्राकृतिक, जलबाट उत्पन्न हुनेलाई कृतिम र पेटभित्र रहने जठराग्नीलाई अग्नीको रुपमा परिभाषित गरिएको छ ।
अग्नीको स्थान आग्नेय कोण हो । भान्छा, जेनेरेटर, विद्युतिय सामाग्रीहरु र तापसँग सम्बन्धित उपकरणहरु दक्षिणपूर्व आग्नेय कोणमा स्थापित गर्नुपर्छ ।
आकाशः शब्दगुणकम्
आकाशले खुलापन बुझाउँछ । ध्वनिलाई गति दिने र विस्तारित हुन सघाउने नै आकाश हो । घर निर्माण गर्दा मिले चारैपट्टि खुला ठाउँ छाड्नु उपयुत हुन्छ । यदि चारैपट्टि खुला छोडन नमिलेमा घरको अगाडि र पछाडि खालि छोडन सकिन्छ। दीर्घायु र सुख–शान्तिका लागि घरको वरिपरि वा अगाडि पछाडि वृक्षारोपण गर्नु राम्रो मानिन्छ ।
शुद्द वायु, शुद्द पानी, शुद्द हावा , शुद्द माटो र शुद्द भूमि नै सफल जीवनको अभिव्यक्ति हो । जीवनमा सुखशान्ति र समृद्दिका लागि सम्पूर्ण तत्वको तालमेल मिलाएर बस्नु नै सफल जीवन हो ।
